គិតត្រឹមល្ងាចថ្ងៃទី ៣ មេសា អាជ្ញាធរមីយ៉ាន់ម៉ាបាននិយាយថា ចំនួនអ្នកស្លាប់ដោយសារគ្រោះរញ្ជួយដីដ៏ខ្លាំងក្លានៅប្រទេសមីយ៉ាន់ម៉ាកាលពីថ្ងៃទី ២៨ ខែមីនា បានកើនឡើងដល់ ៣.១៤៥ នាក់ ខណៈដែលក្រុមជួយសង្គ្រោះនៅតែបន្តស្វែងរកសាកសពបន្ថែមទៀត នេះបើយោងតាមទូរទស្សន៍រដ្ឋមីយ៉ាន់ម៉ា MRTV ។

បន្ថែមពីលើនេះ ការរញ្ជួយដីនៅមីយ៉ាន់ម៉ា ក៏បានធ្វើឱ្យមនុស្សចំនួន 4,589 នាក់បានរងរបួស និង 221 នាក់បាត់ខ្លួនផងដែរ នេះបើយោងតាមទីភ្នាក់ងារសារព័ត៌មាន Xinhua ។

យោងតាម ​​MRTV អង្គការជំនួយមនុស្សធម៌កំពុងប្រញាប់ប្រញាល់ផ្តល់សេវាវេជ្ជសាស្រ្ត និងការស្នាក់នៅដល់អ្នករស់រានមានជីវិតពីគ្រោះរញ្ជួយដីនៅមីយ៉ាន់ម៉ា។

កងពន្លត់អគ្គីភ័យមីយ៉ាន់ម៉ាកំពុងសម្របសម្រួលជាមួយក្រុមជួយសង្គ្រោះអន្តរជាតិដើម្បីធ្វើប្រតិបត្តិការស្វែងរក និងជួយសង្គ្រោះនៅក្នុងតំបន់ដែលរងផលប៉ះពាល់យ៉ាងខ្លាំងដោយការរញ្ជួយដី។

មកទល់ពេលនេះ ក្រុមជួយសង្គ្រោះបានជួយសង្គ្រោះមនុស្សចំនួន ៦៥៣នាក់ ដែលជាប់នៅក្រោមគំនរបាក់បែក និងបានរកឃើញសាកសពចំនួន ៦២៦នាក់។

នាយកដ្ឋានឧតុនិយម និងជលសាស្ត្ររបស់ប្រទេសមីយ៉ាន់ម៉ា បាននិយាយថា គិតត្រឹមព្រឹកថ្ងៃទី៣ ខែមេសា ប្រទេសនេះបានកត់ត្រាការរញ្ជួយដីចំនួន ៦៦ ដែលមានកម្រិតចាប់ពី ២,៨ ដល់ ៧,៥ នៅលើមាត្រដ្ឋាន Richter ដែលបន្តបង្កក្តីបារម្ភដល់ប្រជាជនរាប់លាននាក់ដែលរស់នៅក្នុងភាពភ័យស្លន់ស្លោ និងអសន្តិសុខ។

ការរញ្ជួយដីកម្រិត 7.7 រ៉ិចទ័រ កាលពីថ្ងៃទី 28 ខែមីនា មានចំណុចកណ្តាលនៅជិតទីក្រុង Mandalay ដែលជាទីក្រុងធំទីពីររបស់ប្រទេសមីយ៉ាន់ម៉ា។ ការរញ្ជួយដីនេះបានបំផ្លាញអគាររាប់ពាន់ខ្នង ផ្លូវដួលរលំ និងស្ពានដែលខូចខាតយ៉ាងធ្ងន់ធ្ងរនៅក្នុងតំបន់ជាច្រើន។

ប្រព័ន្ធផ្សព្វផ្សាយក្នុងស្រុកបានរាយការណ៍ថាចំនួនអ្នកស្លាប់អាចខ្ពស់ជាងតួលេខផ្លូវការ។ ជាមួយនឹងការដាច់ទំនាក់ទំនងរីករាលដាល និងតំបន់ដាច់ស្រយាលជាច្រើន តួលេខជាក់ស្តែងអាចបន្តកើនឡើងយ៉ាងខ្លាំងក្នុងពេលខាងមុខនេះ។

យោងតាមរបាយការណ៍ដែលចេញផ្សាយដោយការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) នៅថ្ងៃទី 3 ខែមេសា ការរញ្ជួយដី និងគ្រោះរញ្ជួយដីបានប៉ះពាល់ដល់មនុស្សជាង 17 លាននាក់នៅក្នុង 57 ទីក្រុងក្នុងចំណោម 330 នៃប្រទេសមីយ៉ាន់ម៉ា។ ក្នុង​នោះ​មាន​មនុស្ស​ជាង​៩​លាន​នាក់​រង​ផល​ប៉ះពាល់​ធ្ងន់ធ្ងរ។