គណៈប្រតិភូ​រដ្ឋាភិបាល​កូរ៉េ​ខាងជើង​ធ្វើ​ទស្សនកិច្ច​នៅ​រុស្ស៊ី

ទីភ្នាក់ងារសារព័ត៌មានកណ្តាលកូរ៉េ (KCNA) បានរាយការណ៍កាលពីថ្ងៃទី ១៥ ខែមករាថា គណៈប្រតិភូរដ្ឋាភិបាលកូរ៉េខាងជើងដឹកនាំដោយ រដ្ឋមន្ត្រីការបរទេស Choe Son Hui បានមកដល់ទីក្រុងមូស្គូ ដើម្បីបំពេញទស្សនកិច្ចផ្លូវការនៅសហព័ន្ធរុស្ស៊ី។

កន្លងមក ទីភ្នាក់ងារសារព័ត៌មាន TASS របស់រុស្ស៊ីក៏បានដកស្រង់ប្រភពដែលនិយាយថា រដ្ឋមន្ត្រីការបរទេស Choe Son Hui នឹងបំពេញទស្សនកិច្ចនៅប្រទេសរុស្ស៊ីចាប់ពីថ្ងៃទី ១៥ ដល់ថ្ងៃទី ១៧ ខែមករា តាមការអញ្ជើញរបស់សមភាគីម្ចាស់ផ្ទះលោក Sergei Lavrov។

ដំណឹងនេះបានកើតឡើងភ្លាមៗបន្ទាប់ពី KCNA បានប្រកាសថា កូរ៉េខាងជើងបានបាញ់សាកល្បងដោយជោគជ័យនូវមីស៊ីលផ្លោងរយៈចម្ងាយមធ្យមឥន្ធនៈរឹង (IRBM) ដែលជាផ្នែកនៃសកម្មភាពជាប្រចាំដើម្បីអភិវឌ្ឍប្រព័ន្ធអាវុធដ៏មានឥទ្ធិពល។

យោងតាម ​​KCNA កាំជ្រួចដែលបំពាក់ក្បាលគ្រាប់នុយក្លេអ៊ែរត្រូវបានបាញ់បង្ហោះនៅរសៀលថ្ងៃទី ១៤ ខែមករា ដើម្បីសាកល្បងការគ្រប់គ្រង និងស្ថេរភាពនៃការហោះហើររបស់ក្បាលគ្រាប់ ក៏ដូចជាភាពជឿជាក់នៃម៉ាស៊ីនឥន្ធនៈរឹងរបស់មីស៊ីល។ សេចក្តីថ្លែងការណ៍របស់ KCNA បាននិយាយថា "ការធ្វើតេស្តនេះមិនបានបង្កផលប៉ះពាល់ណាមួយដល់សុវត្ថិភាពនៃប្រទេសជិតខាងរបស់យើងទេ ហើយមិនមានជាប់ពាក់ព័ន្ធនឹងស្ថានភាពសន្តិសុខក្នុងតំបន់នោះទេ"។

មុននេះ យោធាកូរ៉េខាងត្បូងបានប្រកាសថា ខ្លួនបានរកឃើញការបាញ់បង្ហោះចេញពីតំបន់មួយនៅក្នុង ឬជុំវិញទីក្រុងព្យុងយ៉ាង នៅម៉ោងប្រហែល 2:55 រសៀល។ នៅថ្ងៃទី 14 ខែមករា (ម៉ោងក្នុងស្រុក) ហើយមីស៊ីលនេះបានហោះប្រហែល 1,000 គីឡូម៉ែត្រមុនពេលធ្លាក់ចូលទៅក្នុងសមុទ្រ។ នេះ​ជា​ការ​បាញ់​មី​ស៊ី​ល​លើក​ដំបូង​របស់​កូរ៉េ​ខាងជើង​ចាប់តាំងពី​ការ​បាញ់​សាកល្បង​មី​ស៊ី​ល​អន្តរទ្វីប Hwasong-18 កាលពី​ថ្ងៃ​ទី​១៨ ខែធ្នូ ឆ្នាំ​២០២៣ ។

ការបាញ់បង្ហោះចុងក្រោយនេះកើតឡើងចំពេលមានការបាញ់ផ្លោងកាំភ្លើងធំជាបន្តបន្ទាប់ពីកូរ៉េខាងជើង និងកូរ៉េខាងត្បូង ដែលជាផ្នែកមួយនៃសមយុទ្ធយោធាបាញ់គ្រាប់ពិតនៅតាមព្រំដែនសមុទ្ររវាងកូរ៉េទាំងពីរ។

ខាន់ ហុង