ការសិក្សាបានបង្ហាញថា ការទទួលទានបន្លែបៃតងមិនត្រឹមតែល្អសម្រាប់សុខភាពរាងកាយប៉ុណ្ណោះទេ ថែមទាំងអាចធ្វើឲ្យសុខភាពផ្លូវចិត្តប្រសើរឡើងផងដែរ។ គ្រាន់តែបន្ថែមផ្លែឈើ ឬបន្លែមួយពេលទៅក្នុងអាហារប្រចាំថ្ងៃរបស់អ្នក អាចធ្វើអោយអារម្មណ៍របស់អ្នកប្រសើរឡើង នេះបើយោងតាម កាសែត Washington Post ។

ការសិក្សារបស់ចក្រភពអង់គ្លេសឆ្នាំ 2023 បានរកឃើញទំនាក់ទំនងរវាងការប្រើប្រាស់ផ្លែឈើខ្ពស់ និងអារម្មណ៍សុខុមាលភាព ទំនុកចិត្ត និងថាមពល។

នៅក្នុងការសិក្សារបស់អូស្ត្រាលីឆ្នាំ 2022 អ្នកដែលទទួលទានបន្លែយ៉ាងតិច 5 ដងក្នុងមួយថ្ងៃ មានហានិភ័យនៃជំងឺធ្លាក់ទឹកចិត្ត 19% ទាបជាងអ្នកដែលញ៉ាំតែមួយដងឬគ្មាន។

របាយការណ៍សំយោគពីការសិក្សាចំនួន 18 ផ្សេងគ្នាក៏បានបង្ហាញផងដែរថា រាល់ការទទួលទានបន្លែ 100 ក្រាម ហានិភ័យនៃជំងឺធ្លាក់ទឹកចិត្តរបស់អ្នកញ៉ាំនឹងថយចុះ 3% ។

ការសិក្សាមួយផ្សេងទៀតរបស់អ្នកវិទ្យាសាស្ត្រជនជាតិអង់គ្លេសក៏បាននិយាយថា ការបង្កើនការទទួលទានបន្លែ និងផ្លែឈើប្រចាំថ្ងៃរបស់មនុស្សម្នាក់ សូម្បីតែការទទួលទានតែមួយដងក៏អាចនាំមកនូវអត្ថប្រយោជន៍សុខភាពផ្លូវចិត្តស្មើនឹងការដើររយៈពេល 10 នាទីសម្រាប់រយៈពេល 8 ថ្ងៃ។

លោកវេជ្ជបណ្ឌិត Uma Naidoo នាយកផ្នែកចិត្តសាស្រ្តផ្នែកអាហារូបត្ថម្ភ និងរបៀបរស់នៅនៃមន្ទីរពេទ្យ Massachusetts General Hospital (USA) បាននិយាយថា "មានភស្តុតាងកាន់តែច្រើនឡើងដែលថាការទទួលទានបន្លែ និងផ្លែឈើកាន់តែច្រើនគឺមានប្រយោជន៍សម្រាប់សុខភាពផ្លូវចិត្ត ជាពិសេសកាត់បន្ថយការថប់បារម្ភ" ។

អាស្រ័យហេតុនេះ ការទទួលទានបន្លែបៃតងច្រើន អាចទុកចន្លោះតិចក្នុងក្រពះរបស់អ្នកសម្រាប់អាហារមិនល្អ ដូចជាបង្អែមជាដើម។ ការស្រាវជ្រាវបង្ហាញថាការទទួលទានផ្អែមច្រើនបង្កើនអារម្មណ៍ថប់បារម្ភ ភ័យស្លន់ស្លោ ឬអស់សង្ឃឹម។

លោកវេជ្ជបណ្ឌិត Naidoo បានបន្ថែមថា អត្ថប្រយោជន៍សុខភាពផ្លូវចិត្តនៃការទទួលទានបន្លែបៃតងច្រើនក៏អាចបណ្តាលមកពីជាតិសរសៃខ្ពស់ដែលយើងទទួលបានផងដែរ ដែលវាជួយលើកកម្ពស់មីក្រូជីវជាតិពោះវៀនដែលមានសុខភាពល្អ។

លើសពីនេះ ការសិក្សាជាច្រើនបានបង្ហាញថា បាក់តេរីក្នុងពោះវៀនគឺជាអ្នករួមចំណែកយ៉ាងសំខាន់ក្នុងការធ្លាក់ទឹកចិត្ត និងការថប់បារម្ភ ដោយសារតែសុខភាពរបស់មីក្រូជីវសាស្ត្រប៉ះពាល់ផ្ទាល់ដល់ការផលិតសារធាតុ serotonin និង dopamine ដែលជាសារធាតុបញ្ជូនសរសៃប្រសាទដែលជួយគ្រប់គ្រងអារម្មណ៍ និងសុខុមាលភាពផ្លូវចិត្ត។