អង្គការរដ្ឋឥស្លាមស្វ័យប្រកាស (IS) បានអះអាងថា សមាជិកនៃអង្គការភេរវករនេះ បានធ្វើការវាយ ប្រហារដោយកាំបិត ដែលបានសម្លាប់មនុស្ស 3 នាក់ និងរបួស 8 នាក់ទៀត នៅក្នុងទីក្រុង Solingen ប្រទេសអាល្លឺម៉ង់។

នៅក្នុងសេចក្តីថ្លែងការណ៍មួយនៅលើកម្មវិធី Telegram ក្រុម IS បានអះអាងថា ការវាយប្រហារនេះគឺដើម្បីសងសឹកជនមូស្លីមនៅគ្រប់ទីកន្លែង។ ជនសង្ស័យដែលត្រូវបានពិពណ៌នាថាជា "អ្នកប្រយុទ្ធ IS" បានកំណត់គោលដៅ "ការប្រមូលផ្តុំពួកគ្រីស្ទាន"។

ជាមួយ​គ្នា​នេះ​ដែរ ប្រព័ន្ធ​ផ្សព្វផ្សាយ​អាល្លឺម៉ង់​បាន​រាយការណ៍​ថា ប៉ូលិស​បាន​ចាប់​ខ្លួន​ជន​សង្ស័យ។ ថ្លែងនៅលើ ARD រដ្ឋមន្ត្រីក្រសួងមហាផ្ទៃនៃរដ្ឋ North Rhine-Westphalia លោក Herbert Reul បាននិយាយថា លោកមានអារម្មណ៍ "ធូរស្រាលបន្តិច" បន្ទាប់ពីអាជ្ញាធរបានចាប់ខ្លួនជនសង្ស័យ។ បើ​តាម​លោក Reul ក្នុង​ពេល​តាម​ប្រមាញ់​នោះ ប៉ូលិស​ក៏​បាន​ចាប់​ខ្លួន​មនុស្ស​ពីរ​នាក់​ទៀត​ដែរ ប៉ុន្តែ​ពួកគេ​មិន​មែន​ជា​ជន​ល្មើស​ទេ។ បច្ចុប្បន្ន​ជនសង្ស័យ​ត្រូវ​បាន​សមត្ថកិច្ច​ធ្វើការ​សាកសួរ ហើយ​សមត្ថកិច្ច​ក៏​បាន​ដកហូត​វត្ថុ​តាង​ជា​ច្រើន​ផង​ដែរ ។

លោក Hendrik Wuest នាយករដ្ឋមន្ត្រីនៃរដ្ឋ North Rhine-Westphalia បានបញ្ជាក់ថា ការវាយប្រហារនេះគឺជាអំពើភេរវកម្ម។ ឧប្បត្តិហេតុនេះបានកើតឡើងនៅពេលល្ងាចនៅ Fronhof - ការ៉េនៅ Solingen ជាកន្លែងដែលពិធីបុណ្យប្រារព្ធខួបលើកទី 650 នៃការបង្កើតទីក្រុង Solingen ត្រូវបានប្រារព្ធឡើង។ ពិធីបុណ្យនេះគ្រោងនឹងប្រព្រឹត្តទៅរយៈពេលបីថ្ងៃ ដោយចាប់ផ្តើមនៅថ្ងៃទី 23 ខែសីហា ហើយត្រូវបានគេប៉ាន់ស្មានថានឹងទទួលភ្ញៀវចំនួន 75,000 នាក់។

គុជ