មុននោះ នារសៀលថ្ងៃទី១២ ខែធ្នូ នៅវិមានប្រធានាធិបតី អគ្គលេខាបក្ស Nguyen Phu Trong និងភរិយាបានអញ្ជើញជាអធិបតីក្នុងពិធីទទួលស្វាគមន៍ជាផ្លូវការចំពោះអគ្គលេខាធិកា និងជាប្រធានរដ្ឋចិន Xi Jinping និងភរិយា ក្នុងដំណើរបំពេញទស្សនកិច្ចផ្លូវរដ្ឋនៅវៀតណាម តាមពិធីសារខ្ពស់បំផុតដែលទុកសម្រាប់ប្រមុខរដ្ឋ។

ក្នុងជំនួបពិភាក្សាជាន់ខ្ពស់រវាងអគ្គលេខាបក្ស Nguyen Phu Trong និងអគ្គលេខាធិកា និងជាប្រធានរដ្ឋចិន Xi Jinping ដែលបានប្រព្រឹត្តទៅភ្លាមៗនោះ មេដឹកនាំទាំងពីរបានពិភាក្សាយ៉ាងស៊ីជម្រៅអំពីស្ថានភាពរបស់បក្ស និងប្រទេសនីមួយៗ ទំនាក់ទំនងរវាងភាគីនិងប្រទេសទាំងពីរ និងបញ្ហាតំបន់ និងអន្តរជាតិដែលយកចិត្តទុកដាក់គ្នាទៅវិញទៅមក។

ភាគីទាំងពីរបានឯកភាពបន្តពង្រឹងទំនុកចិត្តនយោបាយ បង្កើនការផ្លាស់ប្តូររវាងថ្នាក់ដឹកនាំជាន់ខ្ពស់នៃបក្សទាំងពីរ និងប្រទេសទាំងពីរតាមរយៈទម្រង់ចម្រុះ និងអាចបត់បែនបាន ព្រមទាំងលើកកម្ពស់តួនាទីណែនាំយុទ្ធសាស្ត្រនៃទំនាក់ទំនងបណ្តាញបក្សសម្រាប់ទំនាក់ទំនងទ្វេភាគីទាំងមូល។ ពង្រឹងកិច្ចសហប្រតិបត្តិការលើវិស័យការពារជាតិ និងសន្តិសុខឱ្យកាន់តែខ្លាំងក្លា ក្លាយជាសសរស្តម្ភមួយនៃទំនាក់ទំនងទ្វេភាគី; ជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគឱ្យកាន់តែស៊ីជម្រៅ និងប្រកបដោយនិរន្តរភាព។ ពង្រឹងការអប់រំស្តីពីទំនាក់ទំនងប្រពៃណីរវាងបក្សទាំងពីរ និងប្រទេសទាំងពីរ ជំរុញការកសាងមូលដ្ឋានគ្រឹះសង្គមកាន់តែរឹងមាំសម្រាប់ទំនាក់ទំនងរវាងបក្សទាំងពីរ និងប្រទេសទាំងពីរ។ ពង្រឹងការសម្របសម្រួលពហុភាគីឱ្យកាន់តែជិតស្និទ្ធ ដើម្បីផលប្រយោជន៍នៃប្រទេសទាំងពីរ និងរួមចំណែកយ៉ាងសកម្មចំពោះផលប្រយោជន៍រួមរបស់សហគមន៍អន្តរជាតិ។