កប.អនឡាញ - នាថ្ងៃទី ៣ ឧសភា ក្នុងការឆ្លើយតបទៅនឹងសំណួររបស់អ្នកសារព័ត៌មានដែលសួរអំពីប្រតិកម្មរបស់វៀតណាមចំពោះសកម្មភាពរបស់ចិន និងហ្វីលីពីននៅតំបន់ថ្មប៉ប្រះទឹក Hoai An, Tri Le និង Cai Vung នៅប្រជុំកោះ Truong Sa អ្នកនាំពាក្យក្រសួងការបរទេសវៀតណាមលោក Pham Thu Hang បានសង្កត់ធ្ងន់ថា៖

“ដូចដែលបានបញ្ជាក់ម្តងហើយម្តងទៀត វៀតណាមមានមូលដ្ឋានច្បាប់ និងភស្តុតាងប្រវត្តិសាស្ត្រគ្រប់គ្រាន់ដើម្បីបញ្ជាក់អធិបតេយ្យភាពរបស់វៀតណាមចំពោះប្រជុំកោះ Truong Sa ស្របតាមច្បាប់អន្តរជាតិ ព្រមទាំងអធិបតេយ្យភាព សិទ្ធិអធិបតេយ្យភាព និងយុត្តាធិការរបស់ខ្លួនលើតំបន់ដែនសមុទ្រដែលបានបង្កើតឡើងស្របតាមច្បាប់ស្តីពីសមុទ្រឆ្នាំ ១៩៨២ របស់អង្គការសហប្រជាជាតិ។

ការដែលភាគីពាក់ព័ន្ធបានបញ្ជូនមនុស្សទៅកាន់អង្គភាពក្រោមអធិបតេយ្យភាពរបស់វៀតណាមដោយគ្មានការអនុញ្ញាតពីវៀតណាម គឺជាទង្វើរំលោភលើអធិបតេយ្យភាពរបស់វៀតណាម ធ្វើឱ្យស្ថានការណ៍កាន់តែស្មុគស្មាញ និងប្រឆាំងនឹងសេចក្តីថ្លែងការណ៍ស្តីពីការប្រតិបត្តិរបស់ភាគីនៅសមុទ្រខាងកើត (DOC) ក៏ដូចជាការខិតខំប្រឹងប្រែងរបស់ប្រទេសនានាក្នុងការចរចាអំពីក្រមប្រតិបត្តិនៃភាគីនៅសមុទ្រខាងកើត (COC)។

វៀតណាមស្នើឱ្យភាគីពាក់ព័ន្ធគោរពអធិបតេយ្យភាពរបស់វៀតណាមចំពោះប្រជុំកោះ Truong Sa មិនចាត់វិធានការដែលធ្វើឱ្យស្ថានការណ៍ស្មុគស្មាញ គោរពតាមច្បាប់អន្តរជាតិ អនុវត្តយ៉ាងម៉ឺងម៉ាត់ DOC និងរួមវិភាគទានរក្សាសន្តិភាព និងស្ថិរភាពនៅសមុទ្រខាងកើត។

ទន្ទឹមនឹងនោះ វៀតណាមក៏បានសន្យាត្រៀមខ្លួនជាស្រេច រួមជាមួយនឹងភាគីពាក់ព័ន្ធ ដើម្បីដោះស្រាយវិវាទលើអធិបតេយ្យភាពទឹកដីនៅសមុទ្រខាងកើត រួមទាំងប្រជុំកោះ Truong Sa ដោយសន្តិវិធី។

វៀតណាមបានប្រាស្រ័យទាក់ទង និងផ្ញើកំណត់ទូតតវ៉ាចំពោះប្រទេសពាក់ព័ន្ធទាក់ទងនឹងសកម្មភាពរំលោភលើអធិបតេយ្យភាពរបស់វៀតណាមចំពោះថ្មប៉ប្រះទឹក Hoai An និងអង្គភាពពាក់ព័ន្ធផ្សេងទៀតរបស់ Truong Sa”។

ប្រភព៖ https://www.vietnamplus.vn/trao-cong-ham-phan-doi-cac-hoat-dong-vi-pham-chu-quyen-viet-nam-tai-truong-sa-post1036379.vnp