រ៉ុក្កែតរុស្ស៊ីដាក់ផ្កាយរណបអ៊ីរ៉ង់ ទៅក្នុងលំហ

ទីភ្នាក់ងារព័ត៌មាន AFP បានរាយការណ៍ដោយដកស្រង់ទូរទស្សន៍រដ្ឋអ៊ីរ៉ង់ថា "ផ្កាយរណបទំនាក់ទំនង Nahid-2 ត្រូវបានបាញ់បង្ហោះចេញពីយានអវកាស Vostochny របស់រុស្ស៊ីដោយប្រើរ៉ុក្កែត Soyuz" ។

ផ្កាយរណប Nahid-2 មានទម្ងន់ 110 គីឡូក្រាម ហើយត្រូវបាន រចនា និងសាងសង់ដោយវិស្វករអ៊ីរ៉ង់។

ក្រៅពី Nahid-2 ក៏មានផ្កាយរណបមកពីប្រទេសផ្សេងៗផងដែរ។ យោងតាមទីភ្នាក់ងារសារព័ត៌មាន Tass បានឱ្យដឹងថា រ៉ុក្កែត Soyuz-2.1b បានដឹកទៅកាន់ទីអវកាស ផ្កាយរណប Ionosfera-M លេខ 3 និងលេខ 4 រួមជាមួយនឹងផ្កាយរណបចំនួន 18 ដែលផលិតដោយប្រទេសរុស្ស៊ី និងប្រទេសដទៃទៀត។

យោងតាម គេហទំព័រ Space.com អ្វីគ្រប់យ៉ាងបានដំណើរការយ៉ាងរលូនក្នុងដំណាក់កាលដំបូងនៃការបាញ់បង្ហោះ ដែលត្រូវបានផ្សាយផ្ទាល់ដោយទីភ្នាក់ងារអវកាសរុស្ស៊ី Roscosmos ។ ការចាក់ផ្សាយបានបញ្ចប់ប្រហែល 10 នាទីបន្ទាប់ពីការចាប់ផ្តើម។

គ្រាប់រ៉ុក្កែត Soyuz ធ្លាប់បានបាញ់បង្ហោះផ្កាយរណបអ៊ីរ៉ង់ជាច្រើន ទៅកាន់ទីអវកាស រួមមាន Khayyam, Pars-1 និង Hodhod។

Nahid-2 ត្រូវ​បាន​គេ​រចនា​ឡើង​ឱ្យ​ស្ថិត​នៅ​ក្នុង​គន្លង​រយៈពេល​ប្រាំ​ឆ្នាំ។

លោកខាងលិចបានសម្តែងការព្រួយបារម្ភជាយូរមកហើយថា ភាពជឿនលឿនផ្នែកបច្ចេកវិទ្យានៅក្នុងកម្មវិធីអវកាសរបស់អ៊ីរ៉ង់ អាចនឹងត្រូវបានប្រើប្រាស់ដើម្បីធ្វើឱ្យប្រសើរឡើងនូវឃ្លាំងអាវុធមីស៊ីលផ្លោងរបស់ខ្លួន។

ព័ត៌មាននៃការបាញ់បង្ហោះបានកើតឡើង នៅមុនកិច្ចចរចានុយក្លេអ៊ែររវាងអ៊ីរ៉ង់ និងអង់គ្លេស បារាំង និងអាឡឺម៉ង់នៅទីក្រុងអ៊ីស្តង់ប៊ុល បន្ទាប់ពីអ៊ីរ៉ង់បានធ្វើសង្គ្រាមរយៈពេល 12 ថ្ងៃជាមួយអ៊ីស្រាអែលកាលពីខែមុន។

កាលពីខែកញ្ញាឆ្នាំមុន អ៊ីរ៉ង់បាននិយាយថា ខ្លួនបានបាញ់បង្ហោះផ្កាយរណបស្រាវជ្រាវ Chamran-1 ដោយជោគជ័យទៅកាន់គន្លង ដោយប្រើរ៉ុក្កែត Ghaem-100 ដែលបង្កើតឡើងដោយ កងកម្លាំងអវកាសឆ្មាំបដិវត្តន៍អ៊ីស្លាម ។