អ្នកបើកយន្តហោះ​ដែលធ្លាក់ចូលសណ្ឋាគារមួយកន្លែង ក្នុងប្រទេសអូស្ត្រាលី មិនមានអាជ្ញាប័ណ្ណហោះហើរទេ។

សណ្ឋាគារ DoubleTree by Hilton បានជម្លៀសភ្ញៀវ និងបុគ្គលិករាប់រយនាក់ នៅពេលដែលឧទ្ធម្ភាគចក្រមួយគ្រឿងបានធ្លាក់នៅភាគខាងជើងរដ្ឋ Queensland នៅព្រឹកថ្ងៃចន្ទ។ អណ្តាតភ្លើងបានឆាបឆេះឡើងនៅលើមេឃពេលយប់ ខណៈដែលយន្តហោះបានផ្ទុះ ប្រេងឥន្ធនៈបានហៀរចេញពាសពេញដំបូលសណ្ឋាគារ និងបំផ្លាញបង្អួចជាច្រើននៅជាន់ខាងលើនៃអគារប្រាំពីរជាន់។

អ្នកទេសចរពីរនាក់ដែលកំពុងដេកនៅជាន់ខាងលើនៃសណ្ឋាគារត្រូវបានបញ្ជូនទៅមន្ទីរពេទ្យដោយមានរបួសស្រាល។ អនុប្រធានប៉ូលីសរដ្ឋ Queensland លោក Shane Holmes បាននិយាយថា អ្នកបើកយន្តហោះកំពុងធ្វើការហោះហើរដោយគ្មានការអនុញ្ញាត ប៉ុន្តែបានបដិសេធមិនធ្វើអត្ថាធិប្បាយលើថាតើឧទ្ធម្ភាគចក្រត្រូវបានគេលួចឬអត់ ឬថាតើការធ្លាក់នេះជាចេតនាឬអត់។

លោក Angus Mitchell ប្រធានក្រុមប្រឹក្សាសុវត្ថិភាពដឹកជញ្ជូនអូស្ត្រាលី (ATSB) បាននិយាយថា ក្រុមអ្នកស៊ើបអង្កេតជឿថា ឧទ្ធម្ភាគចក្រនេះបានហោះឡើងពីដែនអាកាសទូទៅនៅអាកាសយានដ្ឋាន Cairns ចម្ងាយប្រហែល ៥ គីឡូម៉ែត្រពីសណ្ឋាគារ។

សាក្សី Veronica Knight បាននិយាយថា នាងបានឃើញឧទ្ធម្ភាគចក្រហោះទាបខ្លាំងនៅលើផ្ទៃទឹក ហើយបន្ទាប់មកបានហោះត្រឡប់មកវិញ ដោយធ្លាក់ចូលដំបូលសណ្ឋាគារមុនម៉ោង 2 ព្រឹក (ម៉ោងក្នុងស្រុក)។ វីដេអូ របស់ Knight បង្ហាញពីអណ្តាតភ្លើង និងផ្សែងហុយចេញពីដំបូលសណ្ឋាគារ។

មនុស្សពេញវ័យទាំង ៤២១ នាក់ កុមារ ៥០ នាក់ និងបុគ្គលិកសណ្ឋាគារពីរនាក់ ត្រូវបានជម្លៀសចេញដោយសុវត្ថិភាព។ ក្រុមអ្នកស៊ើបអង្កេត រួមទាំងក្រុមស៊ើបអង្កេតគ្រោះថ្នាក់ និង ATSB កំពុងប្រមូលភស្តុតាង និងធ្វើការសម្ភាសន៍ ដើម្បីបញ្ជាក់អំពីហេតុការណ៍នេះ។

កៅ ផុង (យោងតាម ​​CNN)