រុស្ស៊ី និងទួរគីបានប្តេជ្ញាពង្រីកវិសាលភាពនៃទំនាក់ទំនង

ប្រធានាធិបតីរុស្ស៊ី លោក វ្ល៉ាឌីមៀ ពូទីន និងប្រធានាធិបតីទួរគី លោក Tayyip Erdogan ជួបពិភាក្សាគ្នានៅខាងក្រៅកិច្ចប្រជុំកំពូលលើកទី៦ នៃសន្និសីទស្តីពីអន្តរសកម្មភាព និងវិធានការកសាងទំនុកចិត្តនៅអាស៊ី (CICA) នៅទីក្រុង Astana ប្រទេសកាហ្សាក់ស្ថាន ថ្ងៃទី 12 ខែតុលា ឆ្នាំ 2022។ (ប្រភព៖ Reuters)។

ប្រធានាធិបតីរុស្ស៊ីបានផ្ញើសារអបអរសាទរដល់សមភាគីទួរគីក្នុងឱកាសខួបលើកទី 100 នៃការប្រកាសសាធារណរដ្ឋទួរគី ដោយបង្ហាញទំនុកចិត្តថាទំនាក់ទំនងរវាងទីក្រុងម៉ូស្គូ និងទីក្រុងអង់ការ៉ានឹងបន្តអភិវឌ្ឍ។

ខ្លឹមសារនៃសារអបអរសាទរដែលបង្ហោះនៅលើគេហទំព័ររបស់វិមានក្រឹមឡាំងបានសរសេរថា "ខ្ញុំជឿជាក់ថា យើងនឹងបន្តពង្រីកយ៉ាងខ្ជាប់ខ្ជួននូវវិសាលភាពនៃទំនាក់ទំនងទ្វេភាគី ដើម្បីជាប្រយោជន៍ដល់ប្រទេសទាំងពីរ ដើម្បីកសាងសណ្តាប់ធ្នាប់ ពិភពលោក ប្រកបដោយយុត្តិធម៌ និងប្រជាធិបតេយ្យជាងមុន"។

លោកប្រធានាធិបតី ពូទីន បាននិយាយថា "ទំនាក់ទំនងរុស្ស៊ី-ទួរគីកំពុងអភិវឌ្ឍដោយឈរលើមូលដ្ឋាននៃមិត្តភាព និងភាពជាអ្នកជិតខាងល្អ ដែលត្រូវបានបញ្ជាក់យ៉ាងពេញលេញនៅក្នុងកិច្ចប្រជុំរបស់យើងនៅទីក្រុង Sochi" ។

យោងតាមមេដឹកនាំរុស្ស៊ី កិច្ចសហប្រតិបត្តិការទ្វេភាគីលើវិស័យផ្សេងៗកំពុងទទួលបានលទ្ធផលវិជ្ជមាន។ លើសពីនេះ ទីក្រុងម៉ូស្គូ និងទីក្រុងអង់ការ៉ា ក៏កំពុងសម្របសម្រួលកិច្ចខិតខំប្រឹងប្រែងរបស់ពួកគេប្រកបដោយប្រសិទ្ធភាពក្នុងដំណើរការដោះស្រាយបញ្ហាសំខាន់ៗលើរបៀបវារៈតំបន់ និងពិភពលោក។

យោងតាមលោកប្រធានាធិបតី ពូទីន ក្នុងរយៈពេលមួយសតវត្សកន្លងមកនេះ ប្រទេសទួរគីបានជម្នះបញ្ហាប្រឈមជាច្រើន និងទទួលបានភាពជោគជ័យជាច្រើនដែលត្រូវបានទទួលស្គាល់ដោយពិភពលោកក្នុង វិស័យសេដ្ឋកិច្ច សង្គម និងវិស័យផ្សេងៗទៀត។ លោក​បាន​សង្កត់​ធ្ងន់​ថា ប្រទេស​តួ​ក​គី​ជា​«​ប្រទេស​មួយ​ដែល​សក្តិសម​នឹង​ទទួល​បាន​ការ​គោរព​ច្រើន​ក្នុង​ឆាក​អន្តរជាតិ​»​។