រុស្ស៊ី​ត្រៀម​ចរចា​រក​ដំណោះស្រាយ​វិបត្តិ​អ៊ុយក្រែន ចោទ​ណាតូ​ថា​កំពុង​រាលដាល​ជម្លោះ ព្រមាន​ពី​ផលវិបាក​មិន​អាច​ទាយ​ទុក​មុន

រដ្ឋមន្ត្រីការពារជាតិរុស្ស៊ីលោក Sergei Shoigu ចូលរួមវេទិកា Xiangshan ក្នុងទីក្រុងប៉េកាំង ប្រទេសចិន ថ្ងៃទី 30 ខែតុលា។ (ប្រភព៖ AP)

នៅឯវេទិកា Xiangshan ដែលជាព្រឹត្តិការណ៍ការទូត យោធា ប្រចាំឆ្នាំដ៏ធំបំផុតរបស់ប្រទេសចិន លោក Shoigu បាននិយាយថា ប្រទេសរុស្ស៊ីបានត្រៀមខ្លួនរួចជាស្រេចដើម្បីចរចាដំណោះស្រាយក្រោយជម្លោះចំពោះវិបត្តិអ៊ុយក្រែន ខណៈពេលដែលកំពុងស្វែងរក "រួមរស់" ជាមួយលោកខាងលិចផងដែរ។

លើសពីនេះ រដ្ឋមន្ត្រីការពារជាតិរុស្ស៊ីក៏បានចោទប្រកាន់លោកខាងលិចថាកំពុងស្វែងរកការពង្រីកជម្លោះនៅអ៊ុយក្រែនទៅកាន់តំបន់អាស៊ី ប៉ាស៊ីហ្វិក ។

ដោយអះអាងថា អង្គការសន្ធិសញ្ញាអាត្លង់ទិកខាងជើង (NATO) កំពុងបិទបាំងការកសាងយោធារបស់ខ្លួននៅក្នុងតំបន់ជាមួយនឹង "បំណងប្រាថ្នាសម្រាប់ការសន្ទនា" មន្ត្រីរូបនេះបាននិយាយថា ប្រទេសណាតូកំពុងលើកកម្ពស់ការប្រណាំងសព្វាវុធ និងបង្កើនវត្តមានរបស់ពួកគេនៅក្នុងតំបន់ ក៏ដូចជាការបង្កើនភាពញឹកញាប់ និងទំហំនៃសមយុទ្ធយោធានៅទីនោះ។

លោកបានបញ្ជាក់ថា ការលុបចោលរបស់រុស្ស៊ីក្នុងការផ្តល់សច្ចាប័នលើសន្ធិសញ្ញាហាមឃាត់ការសាកល្បងនុយក្លេអ៊ែរគ្រប់ជ្រុងជ្រោយ មិនមែនមានន័យថាកិច្ចព្រមព្រៀងនេះនឹងបញ្ចប់នោះទេ ហើយទីក្រុងមូស្គូមិនបន្ថយកម្រិតប្រើប្រាស់អាវុធនុយក្លេអ៊ែរនោះទេ។

លើសពីនេះ រដ្ឋមន្ត្រី Shoigu បានព្រមានលោកខាងលិចថា ការកើនឡើងភាពតានតឹងរវាងរុស្ស៊ី និងអ៊ុយក្រែន បានប្រថុយនឹងនាំឱ្យមាន "ជម្លោះយោធាដោយផ្ទាល់រវាងមហាអំណាចនុយក្លេអ៊ែរ" ។

រដ្ឋមន្ត្រីការពារជាតិរុស្ស៊ីបានសង្កត់ធ្ងន់ថា "ការកើនឡើងជាលំដាប់របស់បស្ចិមប្រទេសនៃជម្លោះជាមួយរុស្ស៊ី នាំឱ្យមានហានិភ័យនៃការប៉ះទង្គិចគ្នាផ្នែកយោធាដោយផ្ទាល់រវាងមហាអំណាចនុយក្លេអ៊ែរ ដែលនឹងមានផលវិបាកដ៏មហន្តរាយ" ។