កិច្ចសន្ទនាសេដ្ឋកិច្ចអាមេរិក-ចិន

ថ្លែងមុនពេលចាកចេញពីសហរដ្ឋអាមេរិក លោក Brent Neiman បានមានប្រសាសន៍ថា តាមរយៈកិច្ចប្រជុំនេះ ភាគីសហរដ្ឋអាមេរិកចង់លើកកម្ពស់ការពិគ្រោះយោបល់លើស្ថិរភាពហិរញ្ញវត្ថុ ពិភាក្សាអំពីបញ្ហាទាក់ទងនឹងទិន្នន័យឆ្លងដែន ការផ្តល់ប្រាក់កម្ចី និងការទូទាត់ កិច្ចខិតខំប្រឹងប្រែងរបស់វិស័យឯកជនដើម្បីលើកកម្ពស់ការផ្លាស់ប្តូរហិរញ្ញវត្ថុ និងជំហានជាក់ស្តែងដែលប្រទេសទាំងពីរអាចអនុវត្តដើម្បីបង្កើនការផ្លាស់ប្តូរព័ត៌មាននៅចំពោះមុខវិបត្តិហិរញ្ញវត្ថុ។

សហរដ្ឋអាមេរិក និងចិន បានឈានដល់កិច្ចព្រមព្រៀងមួយ ដើម្បីបង្កើតក្រុមការងារហិរញ្ញវត្ថុមួយ ក្នុងអំឡុងពេលដំណើរទស្សនកិច្ចរបស់លោកស្រី Janet Yellen រដ្ឋមន្ត្រីក្រសួងហិរញ្ញវត្ថុសហរដ្ឋអាមេរិក ទៅកាន់ទីក្រុងប៉េកាំង ក្នុងខែកក្កដា ឆ្នាំ២០២៣។ ក្រុមការងារនេះ បម្រើជាបណ្តាញទំនាក់ទំនងគោលនយោបាយជាប្រចាំ រវាង ប្រទេសដែល មានសេដ្ឋកិច្ចឈានមុខគេទាំងពីររបស់ពិភពលោក ដោយមានគោលបំណងរក្សាស្ថិរភាពសេដ្ឋកិច្ចរវាងសហរដ្ឋអាមេរិក និងចិន ចំពេលមានភាពតានតឹងពាណិជ្ជកម្មទ្វេភាគីកើនឡើង។ នេះគឺជាកិច្ចសន្ទនាជុំទីប្រាំ សម្រាប់ក្រុមការងារហិរញ្ញវត្ថុ និងជាលើកទីពីរ ដែលបានធ្វើឡើងនៅក្នុងប្រទេសចិន។ អ្នកសង្កេតការណ៍ជឿជាក់ថា កិច្ចសន្ទនារវាងក្រុមការងារហិរញ្ញវត្ថុសហរដ្ឋអាមេរិក-ចិន នឹងមានឥទ្ធិពលវិជ្ជមានទៅលើទស្សនៈរបស់អាជីវកម្មសហរដ្ឋអាមេរិក ក៏ដូចជាទំនាក់ទំនងទ្វេភាគីផងដែរ។

ការសន្ទនានេះកំពុងកើតឡើងនៅក្នុងបរិបទដែលសេដ្ឋកិច្ចឈានមុខគេទាំងពីររបស់ពិភពលោកកំពុងធ្លាក់ចូលទៅក្នុងរង្វង់ពន្ធគយកើនឡើង និងវិធានការសងសឹក។ យោងតាមសេចក្តីប្រកាសមួយពីការិយាល័យតំណាងពាណិជ្ជកម្មសហរដ្ឋអាមេរិក ដែលមានប្រសិទ្ធភាពចាប់ពីថ្ងៃទី 1 ខែសីហា សហរដ្ឋអាមេរិកបានបង្កើនពន្ធគយយ៉ាងច្រើនលើទំនិញនាំចូលពីប្រទេសចិនដែលមានតម្លៃ 18 ពាន់លានដុល្លារ រួមទាំងអាគុយរថយន្តអគ្គិសនី បន្ទះឈីបកុំព្យូទ័រ និងផលិតផល វេជ្ជសាស្ត្រ ។ ទីក្រុងវ៉ាស៊ីនតោនក៏បានរក្សាពន្ធគយដែលដាក់ក្នុងឆ្នាំ 2018 ក្រោមការដឹកនាំរបស់ប្រធានាធិបតី ដូណាល់ ត្រាំ លើផលិតផលចិនដែលមានតម្លៃ 300 ពាន់លានដុល្លារ។ ផ្ទុយទៅវិញ ទីក្រុងប៉េកាំងក៏បានអនុវត្តវិធានការសងសឹកផងដែរ រួមទាំងការហាមឃាត់ក្រុមហ៊ុនអាមេរិកមួយចំនួនមិនឱ្យចូលរួមក្នុងសកម្មភាពនាំចូល នាំចេញ និងវិនិយោគថ្មីដែលទាក់ទងនឹងប្រទេសចិន។ ថ្មីៗនេះ ទីក្រុងប៉េកាំងបានបង្ហាញថា ខ្លួនអាចពិចារណាបង្កើនពន្ធគយជាបណ្តោះអាសន្នលើរថយន្តនាំចូលដែលបំពាក់ដោយម៉ាស៊ីនទំហំធំពីសហរដ្ឋអាមេរិក និងសហភាពអឺរ៉ុប។

ថាញ ហាំង