កិច្ចប្រជុំបានផ្តោតលើបញ្ហាសុវត្ថិភាពដែលកើតឡើងពីការអភិវឌ្ឍន៍យ៉ាងឆាប់រហ័សនៃ AI ជាពិសេស AI ជំនាន់ថ្មី ជាមួយនឹងការព្រួយបារម្ភអំពីហានិភ័យនៃការប្រើប្រាស់ខុស ឬការបាត់បង់ការគ្រប់គ្រងលើបច្ចេកវិទ្យានេះ។

លោក Wang Yun Jong មេដឹកនាំការិយាល័យសន្តិសុខជាតិរបស់ប្រធានាធិបតីកូរ៉េខាងត្បូងបានសង្កត់ធ្ងន់លើតម្រូវការសម្រាប់ "ការឆ្លើយតបកម្រិតជាតិយ៉ាងសកម្ម" ដើម្បីធានាសន្តិសុខចំពេលមានការអភិវឌ្ឍន៍យ៉ាងឆាប់រហ័សនៃបច្ចេកវិទ្យា AI ។

ការបង្កើតក្រុមប្រឹក្សាសន្តិសុខ AI របស់ប្រទេសកូរ៉េខាងត្បូងឆ្លុះបញ្ចាំងពីនិន្នាការទូទៅមួយ ខណៈដែលរដ្ឋាភិបាលជុំវិញពិភពលោកមានការព្រួយបារម្ភកាន់តែខ្លាំងឡើងអំពីផលប៉ះពាល់នៃ AI មិនត្រឹមតែផ្នែកបច្ចេកវិទ្យាប៉ុណ្ណោះទេ ថែមទាំងទាក់ទងនឹងសន្តិសុខជាតិ កម្មសិទ្ធិបញ្ញា និងក្រមសីលធម៌នៅក្នុងកម្មវិធី AI ផងដែរ។

ពាក់ព័ន្ធនឹង AI ផងដែរ OpenAI ដែលជាក្រុមហ៊ុននៅពីក្រោយ ChatGPT កំពុងប្រឈមមុខនឹងការប្តឹងផ្តល់ជាបន្តបន្ទាប់ពី កាសែត New York Times សិល្បករ តន្រ្តីករ និងអ្នកបោះពុម្ពផ្សាយជុំវិញបញ្ហារក្សាសិទ្ធិ។

អ្នកនាំពាក្យ OpenAI បាននិយាយថា ខណៈពេលដែលគោលដៅរបស់ក្រុមហ៊ុនគឺផ្តល់សេរីភាពច្នៃប្រឌិតអតិបរមាដល់អ្នកប្រើប្រាស់របស់ខ្លួន វានឹងបន្តកែសម្រួលគោលនយោបាយរបស់ខ្លួនដោយផ្អែកលើមតិកែលម្អពីអ្នកប្រើប្រាស់ និងសាធារណៈជន។

OpenAI ក៏កំពុងបញ្ចុះបញ្ចូលរដ្ឋាភិបាលសហរដ្ឋអាមេរិកឱ្យធ្វើច្បាប់លើការប្រើប្រាស់ខ្លឹមសាររក្សាសិទ្ធិក្រោមគោលការណ៍ "ការប្រើប្រាស់ដោយយុត្តិធម៌" ដែលជាបទប្បញ្ញត្តិនៃច្បាប់រក្សាសិទ្ធិរបស់សហរដ្ឋអាមេរិក ដែលអនុញ្ញាតឱ្យប្រើប្រាស់ផ្នែកខ្លះនៃការងាររក្សាសិទ្ធិដោយគ្មានការអនុញ្ញាត។