ទ្វីបអាហ្វ្រិកប្រកាសអាសន្ន ជុំវិញការផ្ទុះឡើងនៃជំងឺអុតស្វា។

រហូតមកដល់បច្ចុប្បន្ន ទ្វីបអាហ្វ្រិកបានកត់ត្រាករណីឆ្លងមេរោគ mpox ជាង ១៥.០០០ ករណី និងអ្នកស្លាប់ចំនួន ៤៦១ នាក់នៅឆ្នាំនេះ ដោយមានករណីឆ្លងជំងឺនេះនៅក្នុងប្រទេសចំនួន ១៨។ ការផ្ទុះឡើងនៃជំងឺនេះនៅសាធារណរដ្ឋប្រជាធិបតេយ្យកុងហ្គោបានចាប់ផ្តើមជាមួយនឹងបំរែបំរួល Clade I បន្ទាប់មកដោយបំរែបំរួល Clade Ib ថ្មី ដែលរីករាលដាលតាមរយៈការប៉ះពាល់ជិតស្និទ្ធ ជាពិសេសក្នុងចំណោមកុមារ។

លោក Jean Kaseya ប្រធានមជ្ឈមណ្ឌលគ្រប់គ្រង និងបង្ការជំងឺអាហ្វ្រិក (Africa CDC) បាននិយាយថា ទ្វីបអាហ្វ្រិកត្រូវការវ៉ាក់សាំងជាង ១០ លានដូស ប៉ុន្តែបច្ចុប្បន្នមានតែប្រហែល ២០០.០០០ ដូសប៉ុណ្ណោះ។ លោកបានសន្យាថានឹងបង្កើនការផ្គត់ផ្គង់វ៉ាក់សាំងយ៉ាងឆាប់រហ័ស។

សហរដ្ឋអាមេរិកកំពុងតាមដានយ៉ាងដិតដល់នូវការរីករាលដាលនៃវីរុសនេះ។ លោក Vedant Patel អ្នកនាំពាក្យរង ក្រសួងការបរទេស បានមានប្រសាសន៍ថា សហរដ្ឋអាមេរិកបានផ្តល់ជំនួយជាង ១៧ លានដុល្លារនៅឆ្នាំនេះ ដើម្បីគាំទ្រដល់កិច្ចខិតខំប្រឹងប្រែងក្នុងការត្រៀមខ្លួននៅអាហ្វ្រិកកណ្តាល និងអាហ្វ្រិកខាងកើត។

ក្រុមហ៊ុនជីវបច្ចេកវិទ្យាដាណឺម៉ាក Bavarian Nordic ក៏បានសន្យាថានឹងបរិច្ចាគវ៉ាក់សាំង mpox ចំនួន ៤០,០០០ ដូសដល់មជ្ឈមណ្ឌលគ្រប់គ្រង និងបង្ការជំងឺអាហ្វ្រិកផងដែរ។

កៅ ផុង (យោងតាម ​​AFP, Reuters)