កូរ៉េ​ខាង​ជើង និង​កូរ៉េ​ខាង​ត្បូង​ចាប់​វេន​គ្នា​ធ្វើ​សមយុទ្ធ​យោធា

យោធាបាននិយាយថា សមយុទ្ធនេះមានគោលបំណងអនុវត្តការដាក់ពង្រាយកងកម្លាំងក្នុងករណីដែលកូរ៉េខាងជើងធ្វើចលនាបង្កហេតុមុនការបោះឆ្នោត សភា របស់ប្រទេសកូរ៉េខាងត្បូងនៅខែក្រោយ។

សមយុទ្ធនេះធ្វើឡើងនៅថ្ងៃទី ១៥ ខែមីនា ជុំវិញកោះ Baengnyeong និង Yeonpyeong ក្បែរព្រំដែនជាមួយកូរ៉េខាងជើងក្នុងសមុទ្រលឿង។ វាបានជាប់ពាក់ព័ន្ធនឹងកម្លាំងសមយុទ្ធដ៏លឿនរបស់កងម៉ារីន យានចុះចត LST-II ឧទ្ធម្ភាគចក្រ Marineon (MUH-1) និងយានជំនិះវាយលុក (KAAV) នេះបើយោងតាមបញ្ជាការការពារកោះភាគពាយ័ព្យ។

ការចូលរួមក្នុងសមយុទ្ធនេះក៏មានឧទ្ធម្ភាគចក្រវាយប្រហារ AH-64E Apache របស់កងទ័ពកូរ៉េខាងត្បូងផងដែរ។

កន្លងមក កូរ៉េខាងត្បូង និងសហរដ្ឋអាមេរិក បានបញ្ចប់សមយុទ្ធប្រចាំឆ្នាំ "Freedom Shield" នៅថ្ងៃទី 14 ខែមីនា ក្នុងគោលបំណងពង្រឹងការរារាំងប្រឆាំងនឹងការគំរាមកំហែងនុយក្លេអ៊ែរ និងកាំជ្រួចរបស់កូរ៉េខាងជើង។

កូរ៉េ​ខាង​ជើង​មិន​ទាន់​ឆ្លើយ​តប​នឹង​សមយុទ្ធ​ចុង​ក្រោយ​របស់​កូរ៉េ​ខាង​ត្បូង​នៅ​ឡើយ​ទេ។ ទោះជាយ៉ាងណាក៏ដោយ នៅថ្ងៃទី 16 ខែមីនា ទីភ្នាក់ងារសារព័ត៌មាន KCNA បានរាយការណ៍ថា មេដឹកនាំកូរ៉េខាងជើង លោក គីម ជុងអ៊ុន បានដឹកនាំសមយុទ្ធយោធាដែលពាក់ព័ន្ធនឹងទាហានឆ័ត្រយោង និងបានអំពាវនាវឱ្យមានការត្រៀមលក្ខណៈយ៉ាងហ្មត់ចត់សម្រាប់សេណារីយ៉ូសង្រ្គាម។ យោងតាម ​​KCNA ការហ្វឹកហ្វឺននេះមានគោលបំណងសាកល្បងការត្រៀមខ្លួនក្នុងការប្រមូលផ្តុំទាហានឆ័ត្រយោងសម្រាប់ផែនការប្រយុទ្ធណាមួយក្នុងស្ថានភាពសង្គ្រាមភ្លាមៗ។

យោងតាមទីភ្នាក់ងារសារព័ត៌មាន KCNA នៅថ្ងៃទី ១៤ ខែមីនា មេដឹកនាំកូរ៉េខាងជើង លោក គីម ជុងអ៊ុន បានដឹកនាំការហ្វឹកហ្វឺនយោធាលើរថក្រោះប្រយុទ្ធថ្មី។ នេះ​ត្រូវ​បាន​គេ​ចាត់​ទុក​ថា​ជា​ការ​បង្ហាញ​កម្លាំង​ក្នុង​បរិបទ​ដែល​កូរ៉េ​ខាង​ត្បូង​និង​អាមេរិក​ទើប​តែ​បញ្ចប់​សមយុទ្ធ​យោធា​រួម។