រដ្ឋមន្ត្រីការបរទេសអូស្ត្រាលី Penny Wong។ (ប្រភព៖ Reuters)

យោងតាមសេចក្តីប្រកាសរបស់ក្រសួងការបរទេសបានឲ្យដឹងថា តបតាមការអញ្ជើញរបស់រដ្ឋមន្ត្រីការបរទេស Bui Thanh Son រដ្ឋមន្ត្រីការបរទេសអូស្ត្រាលី Penny Wong នឹងមកបំពេញទស្សនកិច្ចជាផ្លូវការនៅវៀតណាម និងធ្វើជាសហប្រធាននៃកិច្ចប្រជុំរដ្ឋមន្ត្រីការបរទេសលើកទី៥ ចាប់ពីថ្ងៃទី២១ ដល់ថ្ងៃទី២៤ ខែសីហា ឆ្នាំ២០២៣។

មុននោះ នាថ្ងៃទី ១២ កក្កដា រដ្ឋមន្ត្រីការបរទេស Bui Thanh Son បានជួបជាមួយរដ្ឋមន្ត្រីការបរទេស Penny Wong ក្នុងឱកាសចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី ៥៦ នៅទីក្រុង Jakarta ប្រទេសឥណ្ឌូនេស៊ី។

នៅក្នុងជំនួបនេះ រដ្ឋមន្ត្រីទាំងពីរបានសម្តែងការពេញចិត្តចំពោះការវិវឌ្ឍន៍ជាវិជ្ជមានក្នុងទំនាក់ទំនងទ្វេភាគី។ ក្នុងឱកាសនេះ លោករដ្ឋមន្ត្រី Bui Thanh Son បានអញ្ជើញរដ្ឋមន្ត្រីការបរទេស Penny Wong មកបំពេញទស្សនកិច្ចនៅវៀតណាមនាពេលឆាប់ៗនេះ និងធ្វើជាសហប្រធាននៃកិច្ចប្រជុំរដ្ឋមន្ត្រីការបរទេសវៀតណាម-អូស្ត្រាលីលើកទី៥។