ក្រសួងការពារជាតិរុស្ស៊ីបាននិយាយថា ក្នុងអំឡុងពេលសមយុទ្ធខាងលើ កាំជ្រួចនាវា Vulcan, Granit និង Onyx ត្រូវបានបាញ់នៅចម្ងាយរាប់រយគីឡូម៉ែត្រ ដើម្បីវាយប្រហារនាវាសត្រូវក្លែងធ្វើនៅសមុទ្រ Bering នេះបើយោងតាមសារព័ត៌មាន Reuters ។

ក្រសួងការពារជាតិរុស្ស៊ីបានបន្ថែមថា សមយុទ្ធនេះពាក់ព័ន្ធនឹងមីស៊ីលបាញ់ពីដី នាវាចម្បាំង និងនាវាមុជទឹក និងទាហានប្រហែល 10,000 នាក់ ព្រមទាំងយន្តហោះ និងឧទ្ធម្ភាគចក្រផងដែរ។

សមយុទ្ធនេះធ្វើឡើងនៅឧបទ្វីប Chukotka របស់រុស្ស៊ី ក៏ដូចជានៅសមុទ្រ Chukchi និង Bering ក្រោមការដឹកនាំរបស់អគ្គមេបញ្ជាការកងទ័ពជើងទឹករុស្ស៊ី ឧត្តមនាវីឯក Nikolai Yevmenov ។ រុស្ស៊ីនិយាយថា សមយុទ្ធថ្មីនេះមានគោលបំណងការពារផ្លូវដឹកជញ្ជូនភាគខាងជើងរបស់ខ្លួននៅតំបន់អាក់ទិក។

កាលពីឆ្នាំមុន ប្រទេសរុស្ស៊ីបាននិយាយថា ខ្លួនគ្រោងនឹងចំណាយប្រាក់ជិត 30 ពាន់លានដុល្លាររហូតដល់ឆ្នាំ 2035 ដើម្បីអភិវឌ្ឍផ្លូវសមុទ្រភាគខាងជើង។ ផ្លូវនេះរត់កាត់តំបន់ពីទីក្រុង Murmansk ភាគពាយព្យនៃប្រទេសរុស្ស៊ី ក្បែរព្រំដែនជាមួយប្រទេសន័រវេស និងហ្វាំងឡង់ ទៅកាន់ច្រកសមុទ្រ Bering ក្បែររដ្ឋអាឡាស្កា ក្នុងសហរដ្ឋអាមេរិក។

ប្រធានាធិបតី វ្ល៉ាឌីមៀ ពូទីន បានលើកឡើងពីសារៈសំខាន់នៃផ្លូវនេះ នៅក្នុងកិច្ចប្រជុំកំពូលនៃបណ្តាប្រទេស BRICS នៅអាហ្វ្រិកខាងត្បូងកាលពីខែមុន ដោយនិយាយថា ទីក្រុងមូស្គូកំពុងមានគម្រោងសាងសង់កំពង់ផែ និងស្ថានីយប្រេងឥន្ធនៈថ្មី ព្រមទាំងពង្រីកកងនាវាបំបែកទឹកកករបស់រុស្ស៊ីផងដែរ។