WHO បញ្ជូនអ្នកជំនាញទៅជួយកុងហ្គោ ធ្វើរោគវិនិច្ឆ័យជំងឺអាថ៌កំបាំង

WHO បាននិយាយនៅថ្ងៃទី ៦ ខែធ្នូថា អ្នកជំនាញមកពីអង្គការនឹងធ្វើដំណើរទៅកាន់ Panzi ដែលជាតំបន់មួយក្នុងខេត្ត Kwango ភាគនិរតី ជាកន្លែងដែលពួកគេនឹងផ្តល់ឱ្យអាជ្ញាធរសុខាភិបាលនូវថ្នាំសំខាន់ៗ និងឧបករណ៍វិភាគរោគ ដើម្បីជួយវិភាគរកមូលហេតុនៃជំងឺអាថ៌កំបាំងនេះ។

WHO បាននិយាយថា ការធ្វើតេស្តមន្ទីរពិសោធន៍កំពុងត្រូវបានធ្វើឡើងដើម្បីកំណត់ពីមូលហេតុ ហើយបានសន្យាថានឹងផ្តល់ព័ត៌មានបន្ថែមនៅពេលដែលមានលទ្ធផល។

Matshidiso Moeti នាយកប្រចាំតំបន់របស់អង្គការសុខភាពពិភពលោកប្រចាំទ្វីបអាហ្រ្វិកបាននិយាយថា "អាទិភាពរបស់យើងគឺផ្តល់ការគាំទ្រប្រកបដោយប្រសិទ្ធភាពដល់គ្រួសារ និងសហគមន៍ដែលរងផលប៉ះពាល់" ។ "យើងកំពុងធ្វើការដើម្បីកំណត់អត្តសញ្ញាណមូលហេតុ ស្វែងយល់ពីរបៀបនៃការបញ្ជូន និងធានាឱ្យមានការឆ្លើយតបរហ័ស និងសមស្រប។"

យោងតាមអង្គការសុខភាពពិភពលោក មានករណីចំនួន ៣៩៤ ករណី និងការស្លាប់ចំនួន ៣០ នាក់ត្រូវបានកត់ត្រានៅក្នុងសង្កាត់សុខភាព Panzi ដោយផ្អែកលើទិន្នន័យរបស់ ក្រសួងសុខាភិបាលសាធារណៈ ។

កាលពីដើមសប្តាហ៍នេះ អាជ្ញាធរក្នុងតំបន់បាននិយាយថា ជំងឺដែលមិនស្គាល់មួយបានសម្លាប់មនុស្ស 143 នាក់នៅក្នុងតំបន់ក្នុងខែវិច្ឆិកា។ រោគសញ្ញានៃជំងឺ ដូចដែលបានកត់ត្រាដោយ WHO រួមមាន ឈឺក្បាល ក្អក ក្តៅខ្លួន ដកដង្ហើមខ្លី និងស្លេកស្លាំង។

ង៉ុក អាញ់ (យោងតាមរ៉យទ័រ)