កូរ៉េ​ខាង​ជើង​បន្ត​បញ្ចេញ​ប៉េងប៉ោង​បន្ថែម​ទៀត​ដែល​ផ្ទុក​សំរាម​ឆ្ពោះ​ទៅ​កាន់​កូរ៉េ​ខាង​ត្បូង

ប៉េងប៉ោង​ផ្ទុក​សំរាម​នៅ​តាម​ផ្លូវ​ក្នុង​ទីក្រុង Incheon ប្រទេស​កូរ៉េខាងត្បូង។ (ប្រភព៖ AP)

អគ្គសេនាធិការចម្រុះរបស់កូរ៉េខាងត្បូង (JSC) បានបញ្ជាក់ថា កូរ៉េខាងជើងបានបន្តយុទ្ធនាការបាញ់បង្ហោះប៉េងប៉ោងរបស់ខ្លួន ហើយបានព្រមានថា ប៉េងប៉ោងអាចហោះឆ្ពោះទៅកាន់ទីក្រុងសេអ៊ូល និងជុំវិញខេត្ត Gyeonggi ។

អ្នកនាំពាក្យរបស់ JCS លោក Lee Chang Hyun បានពន្យល់ថា ប៉េងប៉ោងកូរ៉េខាងជើងត្រូវបានបំពាក់ជាមួយឧបករណ៍កំណត់ពេលវេលាកំដៅ ដើម្បីបំបែកសំរាមចេញពីប៉េងប៉ោង ហើយទម្លាក់វាទៅដី ប៉ុន្តែឧបករណ៍ទាំងនោះអាចបង្កជាអគ្គីភ័យ ប្រសិនបើមិនបានបិទឱ្យបានត្រឹមត្រូវ។

លោកក៏បានសង្កត់ធ្ងន់ថា "ការបាញ់ទម្លាក់ប៉េងប៉ោងនៅកណ្តាលអាកាស បង្កើនហានិភ័យនៃកំទេចកំទី ឬវត្ថុគ្រោះថ្នាក់ធ្លាក់ដល់ដី" ដូច្នេះ សកម្មភាពដែលមានសុវត្ថិភាពបំផុតនៅពេលនេះ គឺត្រូវប្រមូលប៉េងប៉ោងឱ្យលឿន បន្ទាប់ពីវាធ្លាក់ដោយខ្លួនឯង។

ចាប់តាំងពីចុងខែឧសភាមក ប្រទេសកូរ៉េខាងជើងបានបាញ់បង្ហោះប៉េងប៉ោងរាប់ពាន់ដែលពោរពេញទៅដោយសំរាម ជាការសងសឹកចំពោះយុទ្ធនាការនៃខិតប័ណ្ណប្រឆាំងទីក្រុងព្យុងយ៉ាងដែលត្រូវបានបញ្ជូនឆ្លងកាត់ព្រំដែនដោយអ្នករត់ចោលស្រុក និងសកម្មជនកូរ៉េខាងជើងនៅក្នុងប្រទេសកូរ៉េខាងត្បូង។

ជាការឆ្លើយតបទៅនឹងការបាញ់បង្ហោះប៉េងប៉ោង យោធាកូរ៉េខាងត្បូងបាននឹងកំពុងផ្សាយកម្មវិធីឃោសនាប្រឆាំងកូរ៉េខាងជើងជារៀងរាល់ថ្ងៃ តាមរយៈឧបករណ៍បំពងសំឡេងនៅតាមព្រំដែនចាប់តាំងពីថ្ងៃទី ២១ ខែកក្កដា។

យោធាកូរ៉េខាងត្បូងបានបដិសេធមិនបាញ់ទម្លាក់ប៉េងប៉ោងដោយផ្ទាល់ពីប្រទេសកូរ៉េខាងជើង ដោយលើកឡើងពីការព្រួយបារម្ភអំពីសុវត្ថិភាព។