មហាសេដ្ឋី Elon Musk ធ្វើ​ដំណើរ​ទស្សនកិច្ច​ដ៏​ភ្ញាក់ផ្អើល​នៅ​ប្រទេស​ចិន ជួប​ជាមួយ​នាយក​រដ្ឋមន្ត្រី Li Qiang

នេះជាដំណើរទស្សនកិច្ចលើកទី២របស់មហាសេដ្ឋី Elon Musk ទៅកាន់ទីក្រុងប៉េកាំងក្នុងរយៈពេលតិចជាងមួយឆ្នាំ។ ឥឡូវនេះប្រទេសចិនគឺជាទីផ្សារដ៏ធំបំផុត របស់ពិភពលោក សម្រាប់រថយន្តអគ្គិសនី។

CCTV បានរាយការណ៍អំពីជំនួបរវាង នាយករដ្ឋមន្ត្រី Li Qiang និងមហាសេដ្ឋី Musk ដែលក្នុងនោះលោក Li បានសន្យាថាប្រទេសចិននឹងធ្វើបន្ថែមទៀតដើម្បីគាំទ្រដល់ក្រុមហ៊ុនបរទេសដែលធ្វើអាជីវកម្មនៅក្នុងប្រទេស។

លោកនាយករដ្ឋមន្ត្រី Li បានបញ្ជាក់ថា ក្រុងប៉េកាំងនឹងផ្តល់បរិយាកាសធុរកិច្ចកាន់តែប្រសើរឡើងសម្រាប់ក្រុមហ៊ុនបរទេស បង្កើតលក្ខខណ្ឌសម្រាប់ការវិនិយោគបរទេសនៅក្នុងប្រទេសចិន។

សម្រាប់ផ្នែករបស់គាត់ មហាសេដ្ឋី Musk បានសរសើរបុគ្គលិកចិនដែលធ្វើការនៅ Tesla Gigafactory ក្នុងទីក្រុងសៀងហៃ។

លោក Musk បានបន្ថែមថា "ក្រុមហ៊ុន Tesla ត្រៀមខ្លួនជាស្រេចដើម្បីចាត់វិធានការបន្ទាប់ ដើម្បីពង្រឹងភាពជាដៃគូរបស់យើងជាមួយប្រទេសចិនឱ្យកាន់តែស៊ីជម្រៅបន្ថែមទៀត ដើម្បីសម្រេចបាននូវលទ្ធផលដែលផ្តល់ផលប្រយោជន៍ទៅវិញទៅមក" ។

នៅព្រឹកថ្ងៃដដែល មហាសេដ្ឋីអាមេរិកបានជួបជាមួយលោក Ren Hongbin ប្រធានក្រុមប្រឹក្សាចិនសម្រាប់ការជំរុញពាណិជ្ជកម្មអន្តរជាតិ ដើម្បីពិភាក្សាអំពីទិសដៅកិច្ចសហប្រតិបត្តិការនាពេលអនាគត និងប្រធានបទផ្សេងទៀត។

Musk បានធ្វើទស្សនកិច្ចចុងក្រោយនៅប្រទេសចិនក្នុងខែមិថុនា ឆ្នាំ 2023។ Tesla មិនបានផ្តល់ព័ត៌មានអំពីកាលវិភាគរបស់លោក Musk ក្នុងអំឡុងពេលដំណើរទស្សនកិច្ចបច្ចុប្បន្នរបស់គាត់ទៅកាន់ប្រទេសចិននោះទេ។

នាយកប្រតិបត្តិក្រុមហ៊ុន Tesla លោក Elon Musk បានទៅដល់ប្រទេសចិនហើយ បន្ទាប់ពីបានលុបចោលដំណើរទស្សនកិច្ចដែលបានគ្រោងទុកទៅកាន់ប្រទេសឥណ្ឌា ដែលរួមមានកិច្ចប្រជុំជាមួយនាយករដ្ឋមន្រ្តីឥណ្ឌា Narendra Modi ។ ហេតុផលនៅពីក្រោយការលុបចោលនេះគឺមិនច្បាស់លាស់។