យោធាអាមេរិក និងហ្វីលីពីន ធ្វើការល្បាតរួមគ្នា នៅសមុទ្រចិនខាងត្បូង

ប្រធានាធិបតីហ្វីលីពីនលោក Ferdinand Marcos Jr. បានប្រកាសនៅលើបណ្តាញសង្គម X នៅថ្ងៃទី 21 ខែវិច្ឆិកាថា "ថ្ងៃនេះជាការចាប់ផ្តើមនៃការល្បាតដែនសមុទ្រ និងផ្លូវអាកាសរួមគ្នា" រវាងយោធាហ្វីលីពីន និងទីបញ្ជាការឥណ្ឌូប៉ាស៊ីហ្វិករបស់សហរដ្ឋអាមេរិកនៅសមុទ្រហ្វីលីពីនខាងលិច ដែលជាផ្នែកនៃសមុទ្រ ចិន ខាងត្បូងដែលទីក្រុងម៉ានីលហៅថាសមុទ្រចិនខាងត្បូង។

មេដឹកនាំរូបនេះបានសរសេរថា "គំនិតផ្តួចផ្តើមដ៏សំខាន់នេះគឺជាសក្ខីភាពមួយចំពោះការប្តេជ្ញាចិត្តរបស់យើងក្នុងការពង្រឹងសមត្ថភាពប្រតិបត្តិការរួមគ្នានៃកងកម្លាំង យោធារបស់យើង ក្នុងការល្បាតដែនសមុទ្រ និងផ្លូវអាកាស" ។

លោកប្រធានាធិបតី Marcos Jr. បាននិយាយថា តាមរយៈកិច្ចខិតខំប្រឹងប្រែងនេះ ហ្វីលីពីនមានគោលបំណងពង្រឹងសន្តិសុខក្នុងតំបន់ និងជំរុញភាពជាដៃគូជាមួយសហរដ្ឋអាមេរិក ដើម្បីការពារផលប្រយោជន៍រួម ដោយបង្ហាញទំនុកចិត្តថា កិច្ចសហប្រតិបត្តិការនឹងរួមចំណែកដល់បរិស្ថានដែលមានសុវត្ថិភាព និងស្ថិរភាពជាងមុន។

មេដឹកនាំរូបនេះបានបន្ថែមថា ការល្បាតរួមគ្នាគឺជាផ្នែកមួយនៃព្រឹត្តិការណ៍ជាបន្តបន្ទាប់ដែលបានព្រមព្រៀងគ្នាដោយភ្នាក់ងារការពារជាតិ និងសន្តិសុខនៃប្រទេសទាំងពីរ។ ការល្បាតត្រូវបានគេរំពឹងថានឹងបន្តរហូតដល់ថ្ងៃទី 23 ខែវិច្ឆិកា។

រ៉យទ័របានដកស្រង់សម្តីលោកវរសេនីយ៍ឯក Eugene Henry Cabusao នៃបញ្ជាការមួយនៅលើកោះ Luzon ភាគខាងជើងហ្វីលីពីន ដែលបាននិយាយថា ការល្បាតរួមគ្នាបានធ្វើឡើងនៅក្រៅកោះនេះ។ មន្ទីរបញ្ចកោណ មិនបានធ្វើអត្ថាធិប្បាយលើសកម្មភាពនេះទេ។

ការប្រកាសរបស់លោក Marcos Jr. ធ្វើឡើងនៅពេលដែលហ្វីលីពីនបានបង្កើនកិច្ចខិតខំប្រឹងប្រែងរបស់ខ្លួនក្នុងការពង្រឹងទំនាក់ទំនងជាមួយសម្ព័ន្ធមិត្តរបស់សហរដ្ឋអាមេរិកនៅឆ្នាំនេះ រួមទាំងការបង្កើនចំនួនមូលដ្ឋានទ័ពអាមេរិកដែលអាចចូលបាននៅក្នុងប្រទេសហ្វីលីពីន។ កាលពីពេលថ្មីៗនេះ ប្រធានាធិបតីហ្វីលីពីនក៏បាននិយាយនៅក្នុងវេទិកាមួយនៅរដ្ឋហាវ៉ៃថា ស្ថានភាពនៅសមុទ្រចិនខាងត្បូងកាន់តែធ្ងន់ធ្ងរជាងពេលមុនទៅទៀត។