យោងតាមសារព័ត៌មាន Yonhap បានឱ្យដឹងថា យោធាកូរ៉េខាងត្បូងកំពុងពិចារណាស្ដារប៉ុស្តិ៍យាមឡើងវិញ ដើម្បីឆ្លើយតបទៅនឹងវិធានការចុងក្រោយរបស់កូរ៉េខាងជើង ក្នុងការដាក់ពង្រាយអាវុធឡើងវិញនៅក្នុងតំបន់គ្មានយោធា (DMZ) ។

កូរ៉េខាងត្បូង និងកូរ៉េខាងជើងបានបំផ្លាញប៉ុស្តិ៍យាមចំនួន 10 នៅតាមតំបន់ DMZ បន្ទាប់ពីកិច្ចព្រមព្រៀងកាត់បន្ថយភាពតានតឹងផ្នែកយោធាអន្តរកូរ៉េដែលបានចុះហត្ថលេខាកាលពីឆ្នាំ 2018 ខណៈដែលភាគីនីមួយៗរក្សាបាននូវប៉ុស្តិ៍យាមមួយ ប៉ុន្តែគ្មានអាវុធដោយសារតែតម្លៃប្រវត្តិសាស្ត្ររបស់វា។

នៅក្រោមកិច្ចព្រមព្រៀង ប៉ុស្តិ៍យាមនៅ Goseong ចម្ងាយប្រហែល 155 គីឡូម៉ែត្រភាគឦសាននៃរដ្ឋធានីសេអ៊ូលរបស់កូរ៉េខាងត្បូងត្រូវបានថែរក្សាទុកជាសម្បត្តិបេតិកភណ្ឌវប្បធម៌។ បន្ថែមពីលើប៉ុស្តិ៍យាមដែលត្រូវបានបំផ្លាញ កូរ៉េខាងត្បូង និងកូរ៉េខាងជើងត្រូវបានគេជឿថាមានប៉ុស្តិ៍យាមចំនួន ៥០ និង ១៥០ នៅតំបន់ DMZ រៀងៗខ្លួន។

រូបថតអេក្រង់ English.hani.co.kr

ប៉ុស្តិ៍យាម Goseong ដែលជាកន្លែងនិមិត្តសញ្ញា និងជាប៉ុស្តិ៍យាមដំបូងមួយដែលត្រូវបានបង្កើតឡើងក្រោយសង្គ្រាមកូរ៉េ (1950-1953) អាចត្រូវបានស្ដារឡើងវិញនូវប្រតិបត្តិការធម្មតា ដែលជាផ្នែកនៃវិធានការដែលត្រូវគ្នារបស់កូរ៉េខាងត្បូងប្រឆាំងនឹងការស្ដារឡើងវិញនូវកន្លែងបែបនេះនៅតាមបណ្តោយព្រំដែនអន្តរកូរ៉េ នេះបើតាមសារព័ត៌មាន Yonhap បានរាយការណ៍ដោយដកស្រង់ប្រភពដែលដឹងពីបញ្ហានេះ។

Yonhap បានដកស្រង់សម្តីមន្ត្រីយោធាកូរ៉េខាងត្បូងបាននិយាយថា "បើប្រៀបធៀបទៅនឹងប៉ុស្តិ៍យាមចំនួន 10 ផ្សេងទៀតដែលត្រូវបានបំផ្លាញ ប៉ុស្តិ៍យាម Goseong មានភាពងាយស្រួលក្នុងការស្តារឡើងវិញ ដោយសារតែកន្លែងនោះនៅនៅដដែល។

យោងតាមប្រភពបានឱ្យដឹងថា យោធាកូរ៉េខាងត្បូងក៏កំពុងរៀបចំបំពាក់ស្ថានីយ៍ត្រួតពិនិត្យបណ្តោះអាសន្ន និងសព្វាវុធជាការឆ្លើយតបទៅនឹងការដាក់ពង្រាយទ័ពឡើងវិញ និងអាវុធធុនធ្ងន់របស់កូរ៉េខាងជើងនៅ DMZ ។

ចំណាត់ការចុងក្រោយនេះបានកើតឡើងបន្ទាប់ពីកូរ៉េខាងត្បូងបាននិយាយថា ខ្លួននឹងស្ដារឡើងវិញនូវវិធានការយោធាទាំងអស់ដែលត្រូវបានផ្អាកក្រោមកិច្ចព្រមព្រៀងឆ្នាំ 2018 បន្ទាប់ពីទីក្រុងសេអ៊ូលបានផ្អាកផ្នែកមួយនៃកិច្ចព្រមព្រៀងក្នុងការតវ៉ាចំពោះការបាញ់បង្ហោះផ្កាយរណបចារកម្មយោធារបស់ទីក្រុងព្យុងយ៉ាងកាលពីល្ងាចថ្ងៃទី 21 ខែវិច្ឆិកា។

យោងតាមរូបថតដែលចេញផ្សាយដោយក្រសួងការពារជាតិកូរ៉េខាងត្បូង ទាហានកូរ៉េខាងជើងកំពុងដំឡើងប៉ុស្តិ៍យាមបណ្តោះអាសន្ន ជាក់ស្តែងកាន់កាំភ្លើង និងឈរយាមនៅពេលយប់នៅខាងក្នុង DMZ ។

មន្ត្រីកូរ៉េខាងត្បូងបាននិយាយថា ពួកគេកំពុងតាមដានយ៉ាងដិតដល់នូវសកម្មភាពរបស់កូរ៉េខាងជើងនៅជិតព្រំដែន ហើយនឹងចាត់វិធានការចាំបាច់ដើម្បីទប់ទល់នឹង "ការបង្កហេតុ" របស់កូរ៉េខាងជើង នេះបើយោងតាម ​​Yonhap ។

នៅក្នុងបទសម្ភាសន៍ជាមួយទូរទស្សន៍ KBS នៅថ្ងៃទី 27 ខែវិច្ឆិកា ទីប្រឹក្សារងសន្តិសុខជាតិកូរ៉េខាងត្បូង លោក Kim Tae-hyo បាននិយាយថា យោធាកូរ៉េខាងត្បូងគ្រោងនឹងស្តារប៉ុស្តិ៍យាមនៅតាមព្រំដែនអន្តរកូរ៉េ ដើម្បីឆ្លើយតបទៅនឹងទីក្រុងព្យុងយ៉ាងដែលបញ្ជូនទាហាន និងសព្វាវុធត្រឡប់ទៅតំបន់ DMZ ។