វ៉ែនតាឆ្លាតវៃ Ray-Ban ជាមួយ AI រួមបញ្ចូលគ្នាបង្កើតភាពទាក់ទាញដ៏អស្ចារ្យ

កាលពីថ្ងៃទី 28 ខែកក្កដា ក្រុមហ៊ុន EssilorLuxottica ដែលជាក្រុមហ៊ុនផលិតវ៉ែនតាឈានមុខគេ របស់ពិភពលោក បាននិយាយថា ការលក់វ៉ែនតា Ray-Ban Meta រួមបញ្ចូលជាមួយបញ្ញាសិប្បនិម្មិត (AI) បានកើនឡើងបីដង ដែលរួមចំណែកដល់ការបង្កើនប្រាក់ចំណេញរបស់ក្រុម។

នៅក្នុងឆមាសទីមួយនៃឆ្នាំនេះ ប្រាក់ចំណូលរបស់ក្រុមបានកើនឡើង 5.5% ដល់ 14 ពាន់លានអឺរ៉ូ (ប្រហែល 16.2 ពាន់លានដុល្លារអាមេរិក) ខណៈដែលប្រាក់ចំណេញសុទ្ធបានកើនឡើងបន្តិច 1.6% ដល់ 1.4 ពាន់លានអឺរ៉ូ។ នាយកប្រតិបត្តិ EssilorLuxottica លោក Francesco Milleri បាននិយាយថា ក្រុមនេះកំពុងរីកចម្រើនយ៉ាងល្អ បើទោះបីជាបរិយាកាសអាជីវកម្មប្រែប្រួលក៏ដោយ។

ទោះជាយ៉ាងណាក៏ដោយ ដូចក្រុមហ៊ុនអឺរ៉ុបជាច្រើនទៀតដែរ ប្រាក់ដុល្លារអាមេរិកដែលខ្សោយបានជះឥទ្ធិពលខ្លះៗដល់លទ្ធផលអាជីវកម្មរបស់ EssilorLuxottica នៅអាមេរិកខាងជើង នៅពេលដែលវាស្ទើរតែមិនរីកចម្រើនក្នុងត្រីមាសទីពីរ។

EssilorLuxottica បាននិយាយថាខ្សែវ៉ែនតាឆ្លាតវៃដែលរួមបញ្ចូល AI របស់ខ្លួនបានបង្កើតការទាក់ទាញដ៏អស្ចារ្យក្នុងរយៈពេលថ្មីៗនេះ។

វ៉ែនតាឆ្លាតវៃមានកាមេរ៉ា កាសស្តាប់ត្រចៀក និងមីក្រូហ្វូនដែលភ្ជាប់មកជាមួយ ដែលអនុញ្ញាតឱ្យអ្នកពាក់ធ្វើឱ្យជំនួយការ AI របស់ Meta ដំណើរការដោយគ្រាន់តែពាក្យបញ្ជា "Hey Meta" ដោយមិនចាំបាច់បើកទូរស័ព្ទរបស់ពួកគេ។ នៅក្នុងខែមិថុនា ក្រុមហ៊ុនក៏បានប្រកាសអំពីខ្សែថ្មីនៃវ៉ែនតា Oakley ដែលដំណើរការដោយ AI ផងដែរ។

EssilorLuxottica បច្ចុប្បន្នជាក្រុមហ៊ុនផលិតកញ្ចក់កែឆ្នៃ និងស៊ុមឈានមុខគេលើពិភពលោក ដោយកាន់កាប់សិទ្ធិផលិតវ៉ែនតាសម្រាប់ម៉ាកប្រណីតល្បីៗជាច្រើនដូចជា Giorgio Armani, Burberry, Chanel, Dolce & Gabbana, Prada និង Versace./។

ប្រភព៖ https://www.vietnamplus.vn/kinh-thong-minh-ray-ban-tich-hop-ai-tao-suc-hut-lon-post1052491.vnp