CTV News រាយការណ៍ថា មនុស្សរាប់ពាន់នាក់ត្រូវបានជម្លៀសចេញ បន្ទាប់ពីភ្នំភ្លើងជាបន្តបន្ទាប់ រួមទាំង Merapi នៅលើកោះ Java ប្រទេសឥណ្ឌូនេស៊ី បានផ្ទុះឡើង។

លោក Agus Budi Santoso ប្រធានទីភ្នាក់ងារស្រាវជ្រាវ និងអភិវឌ្ឍន៍បច្ចេកវិជ្ជាគ្រោះមហន្តរាយភូគព្ភសាស្ត្រ របស់ប្រទេសឥណ្ឌូនេស៊ី បាននិយាយថា ល្បាយនៃថ្ម និងកម្អែភ្នំភ្លើង បានធ្វើដំណើរដល់ទៅ 2km ចុះពីជម្រាលភ្នំ Merapi ។ បង្គោល​ផេះ​កម្ពស់​១០០​ម៉ែត្រ​បាន​គ្រប​ដណ្តប់​លើ​ភូមិ​ក្បែរ​នោះ ប៉ុន្តែ​ជា​សំណាង​ល្អ​មិន​បណ្ដាល​ឲ្យ​មនុស្ស​រង​របួស។

Merapi (កម្ពស់ 2,968 ម៉ែត្រ) គឺជាភ្នំភ្លើងសកម្មបំផុតក្នុងចំណោមភ្នំភ្លើងជាង 120 នៅទូទាំងប្រទេសឥណ្ឌូនេស៊ី។ ការផ្ទុះនេះគឺជាការផ្ទុះចុងក្រោយបំផុតចាប់តាំងពីអាជ្ញាធរបានដំឡើងកម្រិតប្រកាសអាសន្នសម្រាប់ភ្នំភ្លើងដល់កម្រិតខ្ពស់បំផុតទីពីរនៅក្នុងខែវិច្ឆិកា ឆ្នាំ 2020 បន្ទាប់ពីទិន្នន័យឧបករណ៍ចាប់សញ្ញាបានកត់ត្រាការកើនឡើងសកម្មភាពរញ្ជួយនៅទីនោះ។

ប្រជាជនដែលរស់នៅលើជម្រាលភ្នំ ត្រូវបានគេណែនាំអោយស្នាក់នៅយ៉ាងតិច 7km ពីរណ្ដៅភ្នំភ្លើង ហើយត្រូវប្រុងប្រយ័ត្នចំពោះការគំរាមកំហែងនៃកម្អែភ្នំភ្លើង។ កាលពីមុន ការផ្ទុះភ្នំភ្លើង Merapi ក្នុងឆ្នាំ 2010 ក៏បានឆក់យកជីវិតមនុស្ស 347 នាក់ និងបង្ខំអ្នកភូមិចំនួន 20,000 ផ្លាស់ប្តូរទីលំនៅ។

មជ្ឈមណ្ឌលកាត់បន្ថយគ្រោះមហន្តរាយភ្នំភ្លើង និងភូគព្ភសាស្ត្រឥណ្ឌូនេស៊ី បាននិយាយថា ក្រៅពីភ្នំ Merapi ភ្នំភ្លើងផ្សេងទៀតក៏បានផ្ទុះឡើងកាលពីចុងសប្តាហ៍ផងដែរ រួមទាំងភ្នំ Lewotobi Laki Laki ក្នុងខេត្ត East Nusa Tenggara ភ្នំ Marapi ក្នុងខេត្ត West Sumatra ភ្នំ Semeru ក្នុងខេត្ត East Java និងភ្នំ Ibu នៅលើកោះ Halmahera ក្នុងខេត្ត North Maluku ។ អាជ្ញាធរ​មូលដ្ឋាន​ត្រូវ​ជម្លៀស​ប្រជាជន​រាប់​ពាន់​នាក់​ដើម្បី​ការពារ​ពី​គ្រោះថ្នាក់។

មិន​មាន​របាយការណ៍​អំពី​ការ​ខូច​ខាត​បន្ទាប់​ពី​ការ​ផ្ទុះ​ចុង​ក្រោយ​នេះ​ទេ។

គុជ